Skattar og gjöld

Auk rekstar- og tryggingarkostnaðar af bifreiðum, þá eru ýmis gjöld og skattar sem fylgja því að eiga, leigja eða yfirhöfuð hafa umráð yfir bifreið. Það er því ágætt að kynna sér þessa kostnaðarliði áður en farið er í að fjárfesta í bifreið.

Það var t.d. hækkun á hlunnindaskatti nú um áramótin um heil 6%, sem gerir það að verkum að umráðamaður bifreiðar þarf nú að greiða enn meiri staðgreiðslu af afnotum af bifreið sem atvinnurekandi lætur í té.

Hér eru nokkrir gjalda- og skattaliðir sem vert er að kynna sér nánar.

Bifreiðagjöld

Flest öll ökutæki þurfa að greiða bifreiðagjöld, þó eru nokkur sem eru undanþegin þessari greiðslu. Upphæð bifreiðagjalds fer eftir þyngd bifreiðar. Gjaldtímabil eru tvö, 1. janúar til 30 júní og 1. júlí til 31.desember. Eigendaskipti geta ekki farið fram nema bifreiðagjöld séu í skilum.

Bifreiðahlunnindi

Þeir sem hafa full og ótakmörkuð umráð yfir bifreið sem þeim er látið í té af atvinnurekanda ber að greiða hlunnindaskatt af bifreiðinni. Ákveðinn prósentuhluti af verðmæti bifreiðarinnar reiknast sem hækkun á tekjustofni. Árið 2004 teljast 26% af verðmæti bifreiðarinnar sem aukinn skattstofn. Um takmörkuð umráð gilda sérstök ákvæði.

Ökutækjastyrkur

Þeir sem hafa fasta mánaðarlega eða árlega fjárhæð í ökutækjastyrk þurfa að greiða staðgreiðslu af þeirri upphæð. Nauðsynlegt er að halda aksturbók, halda saman kvittunum um rekstur og þess háttar svo hægt sé að óska eftir frádrætti á móti ökutækjastyrk.

Virðisaukaskattur af bifreiðum

Almennt innskattsbann er á hefðbundum fólksbifreiðum. Aðeins hefur borið á því að rekstaraðilar sem eru með bifreiðar á rekstrarleigu hafa verið að innskatta fólksbíla á bláum númerum. Það er með öllu óheimilt. Hins vegar eru ákveðin ökutæki, svokölluð Vsk-ökutæki sem er hægt að nýta til innskatts.